author’s note: read it aloud for the effect to kick in. have written it that way. thanks for stopping by. 🙂

hota hai.
kucch khota hai.
kucch kareeb se guzar jaata hai.
kucch paas hoke nazar nahin aata.

chalta hai.
saala samay pal pal ke hisaab se badhta hai.
kucch sawaal ye humse karta hai.
kucch sawaal hum isse kurte hain.
ek doosre se phir mooh pher,
roothe hue chalte hain.

sambhalta hai.
jawaabon ka saamna kurne se darr lagta hai.
akele baith hum sochte hain.
khud se baatein bolte hain.
phir unhi alfaazon se ghabraate hain.
jaane kis se darr, hum sehem jaate hain.

nahin hota.
nahin chalta.
nahin sambhalta.
kyun hum isse samajh nahin paate.
ek sipaahi ke peeche hum apni raani ganwaate hain.

kyun hum ye jhooth jeete hain.
roz zeher ki do boond peete hain.

iss dil aur dimaag ki kashmakash mein.
hum dil ka saath kyun chodh dete hain.
hum iss dil se bhaagte hain.
aur ye dil humein khud se bhagaata hai.

hota hai.
kucch khota hai.
dagmaate hue, in lehron pe badhta hai.
girte-girte sambhalkar,
chalta hai.
hota hai.
kucch khota hai.

Advertisements