Category Archives: Hindi

Bade ho rahe ho aap

25 Thursday Aug 2016

Posted by in Hindi, jinxed rhymes

≈ 2 Comments

 

bade ho rahe ho aap

Chalo bete, bahar jaao,
Shaam ho rahi hai,
Thoda ghoom ke aao.
Dost intezaar kar rahe honge aapke,
Abhi umar hai,
Khelo, koodo, muskaraao,
Beta, bachhe ho abhi aap.

..

..
Arre, abhi tak bahar?
Waqt ka andaaza naa laga,
Yaa dimaag shaitaan ko de aayin aap?
Padhai karni hai,
Hazaaron cheezein hain zamaane mein,
Kab samjhoge,
Beta, bade ho rahe ho aap.

..

..
Haan, pata hai humein,
Wo aapke bachpan ka dost hai,
Magar hamaari izzat ka bhi kucch karo lihaaz.
Mahaulle waale kya sochenge?
Ek hi to beti hai hamaari,
Naam kharaab hua to jaayenge kahan?
Sharma ji ki dekho beti,
Government school mein padhke laayi hai 85%,
Private school mein padhke kya yahi seekha aapne?
Kab samjhoge?
Bete bade ho rahe ho aap.

..

..
Haan, maana aap bade doctor ho,
Bade sheher mein rehte ho,
Lambi gaadi hai aapki!
Magar humaari zindagi to yahin hai.
Biraadari kya sochegi?
Nahin beta, maana wo bhi doctor hai,
But apni jaat ka to hai nahin.
Hamaare khaandaan mein kisi nein aisa nahin kiya,
Komal chaachi ki betiyon ko dekho,
Kaise dhoom dhaam se vidaayi ki thi.
Sirf apne baare mein mat socho gudiya,
Beta maan jaao,
Beta,
Beta bade ho gaye ho aap.

 

 

 

Advertisement

dard muskuraata hai

05 Monday Mar 2012

Posted by in Hindi, jinxed rhymes

≈ 8 Comments

Tags

, , ,

writer’s note:
while reading it, please give proper emphasis on the two parts separated by comma. “dard” and “muskuraata hai” isn’t meant to be read as “dard muskuraata hai”.

Bolta hai kucch mujhse,
Par kehte kehte chup ho jaata hai.
Door se aanhein bharta,
Dard, muskuraata hai.

Darta hai unn deewaaron se,
Patthar ki buni lakeeron se.
Khaamoshi mein sehta, aage badhta,
Dard, muskuraata hai.

Sheeshon ko dekhta,
Todkar, unke tukde nihaarta hai.
Khud ki parchaayin se bhaagta,
Dard, muskuraata hai.

Peshaane pe lakeerein,
Aur aankhon ke aansu chupaata hai,
Par shabdon ka mohtaaj nahin ye,
Dard, muskuraata hai.

Sharmaata hai,
Phir mudke chala jaata hai.
Phir door se dekh,
Khilkhilaata,
itraata hai,
Dard,
dard muskuraata hai.

Apne Paraaye Sapne(Hindi)

17 Monday Oct 2011

Posted by in Hindi, jinxed rhymes

≈ 2 Comments

Aansu jhalakte hain,
Khud se sawaal kurte hain.

Ye chot tune kahan se khaayi hai,
Ya kahin khud ko pahunchaayi hai.

Akelapan kisi ko nahin bhaata,
Sooni sadkein sooni galiyan dekh dil bhar aata.

Nasha ek zarurat ban jaata,
Saare pal kaatne ki himmat ye dilaata.

Jawaabon ka saamna nahin karna,
Sawaalon se itraate hain,
Galatiyan jhelne ka hosla nahin,
Phir bhi unhe baat bebaat dohraate hain.

Itna gir chuke hain ke chalne se darte hain,
Ladai ke maidaan jaane se mukarte hain.

Dhoop jhel jhel ke thak chuke,
Ek suhaani chaanv ke sapne hain.

Saare apne paraaye hain,
Saare paraaye apne hain.

raat(Hindi)

25 Sunday Sep 2011

Posted by in Hindi, jinxed rhymes

≈ 1 Comment

khamosh,
bezubaan raat.

sooni,
anjaani raahein,
tarashti, jhoojhti,
kaali raat.

khilaadi the hum kabhi,
iss jhilmilaati raat ke.
kaidi hain abb,
iss raat ke andhere mein.

na kucch aata nazar,
na kucch aata samajh.
raston ko begaana banaati hui,
sehme zehen to dastak deti hui,
ye raat.

kabhi ye andhera tha thikaana.
gum hue, khelte the iski parchai mein.

kabhi kiya karte the intezaar iske hone ka,
abb karte hain dua ke guzar jaaye ye,
raat.

aye dil (Hindi)

10 Saturday Sep 2011

Posted by in Hindi, jinxed rhymes

≈ 2 Comments

here goes the second post in Hindi. penning something down is much more challenging here!


aye dil, tu kyun majboor hota hai,
chaar ghoont daaru se chupke tu kyun sota hai.

badh chal tu iss sama mein,
dard baantne se itna kyun darta hai.

vehem nikaal de ki tu akela hai,
apni pehchaan tu khud se kyun khota hai.

aye dil, tu kyun udaas hota hai,
khushi ka mukhota daal maayus kyun hota hai.

jo nahin tha tera wo aaj bhi utna dur hai,
ponch le inn aankhon se nami ki hansi chupa le.

baadalon ke peeche chupkar,
tu kyun sawaal kurta hai,
baras jaa malhaar ke saath,
garaj jaa uspar jo tujhe udaas karta hai,
aye dil, tu kyun sawaal karta hai.

manzil pe pahunch ke bhi tu akela hai,
kya hai jo tu sabse chupa raha,
bol de jo aaj tere zehen mein hai,
tu inta kisse darta hai.

tod de wo zanzeerein,
alfaazon ko ugal de.
shabd naa mile to gam nahin,
apni aankhon se tu sab bayan kur de.

ki aaj bhi tu kyun rota hai,
sab paas ho tu majboor kyun hota hai.
khud ko aaine se door rakh,
chaar ghoont maar tu kyun sota hai,
aye dil, tu kyun majboor hota hai.

manzilein (Hindi)

08 Thursday Sep 2011

Posted by in Hindi, jinxed rhymes

≈ 7 Comments

First effort at Hindi. Wrote this just when I was done with Zindagi Milegi.. which as a movie, didn’t like much, but the poems were worth!


aarzo humein le aayi ye kahan,
manzilein nazar aati naa yahan.

kahan kho gaye hain hamare raaste,
sab kucch hai paas magar khud se door hain.

mehsoos karna seekh ehsaason ko bhool gaye,
neher mein kood, nadi ko tarashne lage.

chalna seekhne se pehle daudne lage hum,
jaagne se pehle sona seekhne lage.

kahan chale hain hum, kya hum talash rahe,
rasta haath lekar, manzilein kyun bhool gaye.